Talibanët formojnë qeverinë e re, ja kush është drejtuesi ri i vendit

Talibanët kanë njoftuar emrat e disa ministrave në detyrë të kabinetit qeveritar të ri në Afganistan.

Mullah Mohammad Hasan Akhund u emërua si udhëheqës i qeverisë së re, tha zëdhënësi kryesor Zabihullah Mujahid në një konferencë shtypi të martën.

Abdul Ghani Baradar do të jetë nënkryetar dhe Sirajuddin Haqqani është emëruar si ministër i Brendshëm.

Sipas Aljazeera udhëheqësi i qeverisë së re ka qenë shefi i organit të fuqishëm vendimmarrës të talibanëve ‘Rehbari Shura’.

“Ne e dimë që njerëzit e vendit tonë kanë pritur për një qeveri të re,” shtoi zëdhënësi Zabihullah Mujahid.

Talibanët morën nën kontroll pjesën më të madhe të vendit më shumë se tre javë më parë. Njoftimi i kabinetit në detyrë është një hap kyç në formimin e një qeverie talebane.

Baradar, i cili drejtoi zyrën politike të talebanëve në Doha, ka qenë fytyra më e dukshme e talebanëve në vitet e fundit pasi shefi i grupit, Haibatullah Akhunzada, qëndron kryesisht jashtë opinionit publik.

I njohur gjerësisht si Mullah Baradar, ai doli si numri dy i talebanëve pas vdekjes së mulla Mohammad Omar në 2013. Omar, shefi themelues enigmatik i talebanëve nuk u pa kurrë në publik.

Mullah Baradar përfaqësoi talebanët në negociatat me Shtetet e Bashkuara në kryeqytetin e Katarit, Doha, duke nënshkruar një marrëveshje me ta më 29 shkurt 2020.

Marrëveshja hapi rrugën për tërheqjen e trupave të huaja nga Afganistani dhe bisedimet ndër-afgane që do të mbahen në Doha.

Ai kishte drejtuar zyrën politike të grupit në Katar që nga janari 2019, muaj pasi u lirua nga burgu pakistanez.

Ai kishte ikur në Pakistan pasi regjimi taleban u përmbys në një pushtim ushtarak të udhëhequr nga SHBA në 2001.

Sarajuddin Haqqani, ministri i ri në detyrë i Brendshëm, është kreu i grupit militant të njohur si rrjeti Haqqani të cilët janë të lidhur me talebanët dhe kanë qenë pas disa prej sulmeve më vdekjeprurëse në luftën dy dekadëshe të vendit. Ndryshe nga talebanët më të gjerë, rrjeti Haqqani është caktuar një organizatë e huaj terroriste nga SHBA.

Emërimet e tjera përfshijnë Mullah Yaqoob si ushtrues detyre i ministrit të mbrojtjes, Amir Khan Muttaqi si ministër i Jashtëm në detyrë dhe Mullah Abdul Salam Hanafi si zëvendës i dytë.