Skandali në azilin e të moshuarëve, Ministria “ia lë topin” Bashkisë së Fierit/ Drejtoresha që “vidhte” pleqtë akoma në detyrë

Emisioni investigativ “Fiks Fare” ka raportuar mbrëmjen e djeshme për një situatë skandaloze në Shtëpinë e të Moshuarëve në qytetin e Fierit. Punonjëset merrnin ushqimet e azilit dhe i dërgonin në shtëpitë e tyre, ndërsa të moshuarëve u jepnin “ndonjë lëng të skuqur, ose ndonjë turli sa për të thënë.”

Sot, Bashkia e Fierit ka reaguar duke pezulluar nga detyra punonjëset që merrnin ushqimet nga azili, ndërsa ka bërë me dije se Shtëpia e të Moshuarëve nuk varej prej tyre por nga Ministria e Shëndetësisë dhe kjo e fundit duhet të merrte masa.

Pikërisht, pas kësaj deklarate ka nisur dhe “ping-pongu” mes institucioneve.

Menjëherë pas Bashkisë së Fierit ka reaguar dhe Ministria e Shëndetësisë. Shërbimi Social Shtetëror, institucion në varësi të Ministrisë, thotë se azili është nën administrimin dhe kompetencat e Bashkisë së Fierit, e drejtuar nga Armando Subashi.

“Për rrjedhojë është kopetencë e Bashkisë Fier administrimi i personelit pranë këtij institucioni (emërime, lirime, masa administrative etj.). Shërbimi Social Shtetëror nuk bën emërimin apo lirimin nga detyra të punonjësve në Shtëpinë e të Moshuarve Fier”, thuhet ndër të tjera në reagim.

Reagimi i Ministrisë së Shëndetësisë:

Nisur nga kronika e publikuar në datën 27 shtator 2021 në emisionin investigativ “Fiks Fare”, Shërbimi Social Shtetëror sqaron se:

Qendra e Shërbimeve për të Moshuarit, Fier, është institucion që ofron shërbim shoqëror rezidencial, për këtë grupmoshë. Ky institucion sipas Vendimit Nr. 850, datë 15.12.2006 pika c. pika 3, ka varësi nga Bashkia Fier, për ndërtesën, fondet, pajisjet, inventarin dhe personelin.

Për rrjedhojë është kopetencë e Bashkisë Fier administrimi i personelit pranë këtij institucioni (emërime, lirime, masa administrative etj.).

Shërbimi Social Shtetëror nuk bën emërimin apo lirimin nga detyra të punonjësve në Shtëpinë e të Moshuarve Fier.

Shërbimi Social Shtetēror alokon fondet për paga, sigurime shoqërore dhe shpenzime operative si edhe monitoron shërbimin e ofruar për të moshuarit, lë rekomandime, ndërsa për fondet bēn auditim ekonomiko financiar.

Nisur nga kronika e publikuar në emisionin Investigativ “Fiks Fare”, është nisur auditimi ekonomiko financiar për gjithë vitin 2021 me shkresën nr. 1753 prot. datë 28.09.2021

 *****************************************************************************************************

Edhe pse kanë kaluar 24 orë nga skandali i transmetuar në emisionin “Fiks Fare” ku punonjëset e një azili të moshuarish në Fier vidhnin ushqime, drejtoresha vijon të jetë ende në detyrë.

Bashkia e Fierit tha sot se ka pezulluar dy punonjëset, të cilat u kapën nga kamera e Fiksit me çantat e mbushura plot me ushqime që duhet t’ia shërbenin të moshuarve.

Por Armando Subashi nuk e ka shkarkuar ende drejtoreshën e këtij institucioni, edhe pse ka kompetenca për çdo gjë, në këtë institucion.

Ndërkohë Ministria e Shëndetësisë ka deklaruar ditën e sotme se e vetmja mënyrë që mund të ndërhyjë siç e parashikon edhe ligji, në këtë situatë është përmes një auditi në institucion përmes Shërbimi Social Shtetēror.

Për shkak të procedurave, një audit ekonomiko-financiar që ka nisur tashmë, do të kërkojë kohë të kryhet. Deri atëherë, drejtoresha duket se do të vijojë e pashqetësuar detyrën.