Në funksionet dhe postet e reja drejtuese brenda PS, Taulant Balla do të mbajë vetëm atë të Kreut të Grupit Parlamentar të PS, duke iu hequr kështu detyra e Sekretarit të Përgjithshëm të PS, që në këtë mandat Rama ia besoi Gjiknurit.
“Ka mbajtur për shumë kohë dy kunguj në një sqetull”-u shpreh Rama për Ballën, teksa i hoqi edhe postin e drejtuesit politik të Elbasanit, që edhe këtë ia besoi Gjiknurit, e duke e degdisur Ballën në Fier. Në elbasan ky i fundit theu rekord votash, duke e lënë vetëm me një funksion edhe këtë radhë pa i dhënë asnjë post ministri.
Ndërkohë që ka emëruar në postin e Sekretares së Rinisë një 20-vjeçare, të quajtur Bojkena Basha, për të cilën Rama u shpreh se “Zgjohet më herët se Basha dhe fle më pak se ai”. Rikujtojmë se kjo e fundit është shfaqur në disa debate televizive me urdhër të partisë.
Lindita Nikolla, e cila u shpërblye me postin e Kryetares së Kuvendit, u shfaq e emocionuar para kamerave. “Jam e përgatitur, jemi të përgatiur për të bërë më të mirën e mundshme për të zgjidhur hallet dhe problemet. Është një emocion i veçantë nuk kam si e fsheh. Kam përgjegjshmërinë maksimale, kam se ç’mësoj nga Zoti Ruci. I lëmë të gjitha vazhdojmë edhe me procedurat e tjera deri në fund të këtij procesi”.- u shpreh ajo.
Ndërkohë që shumica e emrave të ministrave nuk kanë ndryshuar duke mbajtur postin e tyre, Manastirliu si Ministre Shëndetësie, Balluku në krye të MIE, Xhaçka ministrinë e Jashtme dhe Peleshi të Mbrojtjes, Çuçi MB, Kushi MASR, Margariti Kulturën dhe Ahmetaj të Rindërtimit duke i zënë postin Braçes, atë të zv/kryeministrit.
Ministra të rinj vihen re Frida Krifca, drejtoresha e AZHBR që do të mbajë postin e ministres së Bujqësisë, Delina Ibrahimi, drejtoresha e Tatimeve u vu në krye të ministrisë së Ekonomisë dhe Financave, Edona Bilali për të cilën është lobuar pafund në fushatë nga vetë Rama me spote të sponsorizuara, iu besua ministria e Sipërmarrjes në vend të Shalsit.
Ndërkohë që shohim emërimin e Ulsi Manjës si ministër Drejtësie, rikthimin e Mirela Kumbaros, ish-ministres së Kulturës, tashmë si ministre e Mjedisit, futjen në qeveri të Milva Ekonomit si Ministre Shteti për Standerdet dhe Shërbimet duke i zhveshur postin e ministres së Bujqësisë, e atë të Bora Muzhaqit, po ashtu si ministre Shteti për Rininë dhe Fëmijët që ndahet nga MAS.
Discussion about this post