Është pezulluar me një vit gjyqi për vrasjen e ish-policit Santiago Malko, kjo si shkak sepse të dyshuarit kryesor të ekzekutimit ndodhen ende në arrati.
Gjykata ka njoftuar se çështja do të vijojë vetëm për Ilir Selmanin, i cili është arrestuar, dhe dyshohet se është personi që fshehu provat pas krimit të rëndë të ndodhur në zonën e ish-Porcelanit në Tiranë, në gusht të 2019-tës.
Personat që janë ende në kërkim për ngjarjen e rëndë, njihen ndryshe dhe si anëtarë të klanit Duka: Leonard Duka; Erlis Duka, Oltian Logu, Dritan Agaj dhe Aleksandër Maxhaku.
Duke iu referuar praktikës së Gjykatës Europiane, personat e dyshuar duhet të marrin dijeni të drejtpërdrejtë për çështjen që janë nën hetim, dhe sa kohë ata ndodhen në arrati, gjyqi është pezulluar.
Familja e të ndjerit Malko ka hedhur vazhdimisht akuza ndaj gjykatës dhe policisë, që sipas tyre nuk po bëjnë drejtësi për vrasjen e të afërmit të tyre.
Santiago Malko u vra mbrëmjen e 27 gushtit 2019 me një atentat të stilit mafioz.
Ai u qëllua teksa po dilte me makinë nga një lavazh në rrugën Xhanfize Keko. Në vendin e vrasjes, policia gjeti rreth 10 gëzhoja, ndërsa makina që u përdor nga atentatorët u gjet e diegur në fshatin Ferraj, rreth 6.5 kilometra nga vendngjarja.
Deri në vitin 2014 Malko kishte qenë polic, por më pas ishte larguar nga detyra.
Discussion about this post