Njerëzit në krye të kupolës së drejtësisë së re, duket se janë po aq të përlyer sa ata që u shkarkuan nga Vetingu.
Krahas ish anëtarit të KPA Luan Daci, i cili u dënua për falsifikim dokumentesh, një tjetër anëtar i Vetingut është hetuar për akuzën e kryerjes së veprimeve që pengojnë zbardhjen e të vërtetës.
Ai është Roland Ilia, i cili rezulton në një dosje penale të prokurorisë së Shkodrës, ku është marrë nën hetim nga prokuroria për akuzën e “Veprime që pengojnë zbardhjen e së vërtetës”.
Bëhet fjalë për dosjen me nr. 964, të vitit 2016 ku gjatë një hetimi proaktiv, në lidhje me këtë procedim, duke përfshirë përgjimet të bisedave telefonike dhe vëzhgime në terren nga policia, janë marrë nën hetim 19 persona, ku 12 prej të cilëve në 2016 është vendosur njoftimi i akuzës nga ana e Prokurorisë Shkodër.
Nën hetim janë marrë edhe pedagogët Merita Hysa, Mimoza Priku, Renato Trushi, Eduard Ndreca aktualisht Kryetar i Këshillit Qarkut Lezhë, si dhe Sandër Beci, i cili sapo është emëruar anëtar i Gjykatës Kushtetuese.
Këta persona dyshoheshin se kanë kryer veprën penale të korrupsionit pasiv të personave që ushtrojnë funksione publike.
Sipas dosjes hetimore për korrupsionin Universitetin e Shkodrës, në 7 Shtator 2016 është nxjerrë një vendim i gjykatës për kontrollin e vendeve dhe konkretisht, për kontrollin në departamentin e të Drejtës Civile dhe vendim për sekuestrimin e provave materiale.
Objekt i sekuestros dhe i kontrollit ishin fletoret e provimeve dhe proceverbalet e tyre për sezonet e vitit 2016.
Në dosje thuhet se Roland Ilia, nuk ka bashkëpunuar me oficerët e policisë gjyqësore duke mos vënë në dispozicion fletoret e provimeve. I pyetur në cilësinë e personit ndaj të cilit zhvillohen hetime, Roland Ilia ka deklaruar se nuk ka qenë në zyrë nga fundi i korrikut dhe deri më datë 07 shtator 2016.
Sipas tij, fletoret e provimeve nuk kanë qenë në vendin ku ai i kishte lënë, pasi çelësin e raftit e kishin shumë persona.
Për këtë arsye ai nuk e ka ditur se ku ndodheshin këto fletore. Këtë dëshmi, prokurorja Esmeralda Ndoci e ka marrë të mirëqenë dhe në datën 17 shkurt 2017 ka vendosur të pushojë akuzën për Roland Ilia, që në atë periudhë ishte pedagog në Fakultetin Juridik pranë Universitetit të Shkodrës.
Në këtë dosje, tashmë të pushuar, ka qenë dhe Sandër Beci, ish anëtar i Këshillit të Lartë të Prokurorisë, i marrë nën hetim për akuzën e korrupsionit pasiv të personave që ushtrojnë funksione publike. Prokuroria thotë se ka pasur dyshime se Sandër Beci, në cilësinë e pedagogut në Shkodër, ka marrë para për të kaluar shtetasen D. K.
Në dosje thuhet se Sandër Beci ka pasur takime të shpeshta me N. D., i dyshuar si sekser, dhe ky i fundit me D.K.
Më tej, në dosjen e prokurorisë së Shkodrës thuhet se: “…në datën 30 qershor 2016 Sandër Beci, telefonohet nga H. Beci, ku e lënë të takohen poshtë shtëpisë. Në 1 qershor 2016 ora 15:38, H. Beci, i dërgon mesazh dhe i thotë:“…për kujtesë quhet K.F., pasi në atë grup ka dy Klaudia…”.
Tek provimi i datës 21 qershor 2016 në të drejtën procedurale Civile K.F., ka marrë notën 5, me pedagogë Sandër Becin dhe I. Duhanxhi…”.
Pavarësisht këtyre rrethanave, prokuroria në vendimin e pushimit thotë se nga provat e mbledhura gjatë hetimit, nuk u bë e mundur të arrihej në një dyshim të arsyeshëm se Sandër Beci ka marrë para në këmbim të marrjes së një note kaluese për studentët.
Discussion about this post