Prokuroria e Tiranës i dorëzon gjykatës ekstradimin e Kreshnik Budllës alias Farruku në drejtim të Italisë. Një prej njerëzve më të shumëpërfolur në botën e krimit, është dënuar nga drejtësia italiane me 6 vite e 8 muaj burgim, për akuzën e trafikut të drogës në kuadër të grupit kriminal.
Farruku u arrestua në muajin gusht në kryeqytet për qëllime ekstradimi, por gjykata e dërgoi atë në masën e arrestit në shtëpi, derisa të mbërrinte kërkesa nga autoritetet përtej Adriatikut. Brenda afatit ligjor, italianët kanë sjellë kërkesën për ekstradimin e Farrukut, i cili dyshohet të ketë drejtuar një rrjet të fuqishëm të trafikut të drogave të forta. Kërkesa është regjistruar në gjykatë dhe pritet që brenda pak ditësh, gjykatësi Artan Gjermeni të caktojë dhe datën e parë të seancës.
Kreshnik Budlla alias Farruku, i cili mban gjithashtu dhe emra të tjerë, është arrestuar më herët edhe në vende të tjera të Bashkimit Europian, por është liruar më pas. Fisi Farruku nga Manza është në konflikt të fortë dhe hasmëri me fisin Kërtalla po nga Durrësi. Së fundmi, Kreshnik Farruku ka qenë edhe subjekt i Operacionit Forca e Ligjit, ku i janë sekuestruar disa nga pasuritë.
Discussion about this post